1ܘܒܵܬ݇ܪ ܕܫܠܹܐܠܹܗ ܫܓܼܘܼܫܝܵܐ؛ ܩܪܹܐܠܹܗ ܦܵܘܠܘܿܣ ܠܬܲܠܡܝܼܕܹ̈ܐ ܘܝܘܼܗ݇ܒܼܵܝܠܹܗ ܠܸܒܵܐ؛ ܘܫܒܼܝܩܵܝܠܹܗ؛ ܘܦܠܸܛܠܹܗ ܕܐܵܙܸܠ ܠܡܵܩܹܕܘܿܢܝܼܵܐ. 2ܘܟܲܕ ܚܕܝܼܪܵܝܠܹܗ ܠܐܲܢܹܐ ܐܲܬܪ̈ܵܘܵܬܹܐ؛ ܘܝܘܼܗَܒܼܵܝܠܹܗ ܠܸܒܵܐ ܪܵܒܵܐ؛ ܐ݇ܬܹܐܠܹܗ ܠܐܲܬܼܪܵܐ ܕܗܲܠܸܣ. 3ܘܦܸܫܠܹܗ (ܬܵܡܵܐ) ܬܠܵܬ݇ܐ ܝܲܪ̈ܚܹܐ. ܐܝܼܢܵܐ ܥܒܸܕܠܗܘܿܢ ܥܲܠܘܼܗܝ ܦܸܠܡܵܐ ܝܗ݇ܘܼܕܵܝܹ̈ܐ؛ ܐܝܼܡܲܢ ܕܗܕܝܼܪܵܐ ܗَܘܵܐ ܠܹܐܙܵܠܵܐ ܠܣܘܼܪܝܼܵܐ؛ ܩܛܸܥܠܹܗ ܒܠܸܒܹܗ ܕܕܵܝܸܪ ܡ̣ܢ ܓܵܘ ܡܵܩܹܕܘܿܢܝܼܵܐ. 4ܘܦܸܠܛܠܗܘܿܢ ܥܲܡܹܗ ܗܲܠ ܐܵܣܝܼܵܐ ܣܹܘܦܵܛܪܘܿܣ ܕܡ̣ܢ ܒܹܪܘܿܐܵܐ ܡܕܝܼܢَܬܵܐ؛ ܘܐܵܪܸܣܛܲܪܟܘܿܣ ܘܣܲܩܘܼܢܕܘܿܣ ܡ̣ܢ ܬܹܣܵܠܘܿܢܝܼܩܵܝܹ̈ܐ؛ ܘܓܵܐܝܼܘܿܣ ܕܡ̣ܢ ܕܲܪܒܹܐ ܡܕܝܼܢَܬܵܐ؛ ܘܛܝܼܡܵܬܹܐܘܿܣ ܕܡ̣ܢ ܠܘܼܣܛܪܵܐ؛ ܘܡ̣ܢ ܐܵܣܝܼܵܐ ܛܘܼܟܼܝܼܩܘܿܣ ܘܛܪܘܿܦܝܼܡܘܿܣ. 5ܐܲܢܹܐ ܐ݇ܙܸܠܗܘܿܢ ܡܩܵܕ݇ܡ ܕܝܼܲܢ؛ ܘܣܦܝܼܪܗَܘܿܢ ܥܲܠܲܢ ܒܛܪܘܿܐܘܿܣ. 6ܐܝܼܢܵܐ ܐܲܚܢܲܢ ܦܠܸܛܠܲܢ ܡ̣ܢ ܦܝܼܠܝܼܦܘܿܣ ܡܕܝܼܢَܬܵܐ ܕܡܵܩܹܕܘܿܢܵܝܹ̈ܐ ܒܵܬ݇ܪ ܝܵܘܡܵܢܹ̈ܐ ܕܦܲܛܝܼܪܹ̈ܐ؛ ܛܪܹܐܠܲܢ ܒܝܵܡܵܐ ܘܐ݇ܬܹܐܠܲܢ ܠܟܸܣܠܵܝܗܝ ܠܛܪܘܿܐܘܿܣ ܒܚܲܡܫܵܐ ܝܵܘܡܵܢܹ̈ܐ؛ ܘܦܸܫܠܲܢ ܬܵܡܵܐ ܫܲܒܼܥܵܐ ܝܵܘܡܵܢܹ̈ܐ. 7ܘܒܝܵܘܡܵܐ ܕܚܲܕَܒܼܫܹܒܵܐ؛ ܟܲܕ ܓ̰ܸܡܥܝܹܐ ܝ݇ܘܲܚ ܗ݇ܘܵܘ ܠܸܩܨܵܝܵܐ ܠܲܚܡܵܐ (ܩܘܼܪܒܵܢܵܐ)؛ ܗܲܡܙܸܡ ܗَܘܵܐ ܥܲܡܵܝܗܝ ܦܵܘܠܘܿܣ؛ ܣܵܒܵܒ ܒܗ̇ܘ ܝܵܘܡܵܐ ܐ݇ܚܹܪ݇ܢܵܐ ܗܕܝܼܪܵܐ ܗَܘܵܐ ܠܸܦܠܵܛܵܐ؛ ܘܡܘܼܪܝܸܟܼܠܹܗ ܠܗܲܡܙܲܡܬܹܗ ܗܲܠ ܦܲܠܓܹܗ ܕܠܲܝܠܹܐ. 8ܘܐܝܼܬ ܗ݇ܘܵܘ ܬܲܡܵܐ ܪܵܒܵܐ ܠܲܡܦܝܼܕܹ̈ܐ ܓܵܘ ܥܸܠܝܼܬܼܵܐ ܕܗ̇ܝ ܕܓ̰ܸܡܥܹܐ ܝ݇ܘܲܚ ܗَܘܵܘ ܓܵܘܵܗ̇. 9ܘܝܬܝܼܒܼܵܐ ܗَܘܵܐ ܚܲܕ݇ ܓ̰ܘܲܢܩܵܐ؛ ܕܫܸܡܹܗ ܐܹܘܛܝܼܟܼܘܼܿܣ ܓܵܘ ܟܵܘܹܐ ܘܒܸܫܡܵܥܵܐ؛ ܘܥܒܸܪܹܗ ܒܫܸܢܬܵܐ ܝܵܩܘܿܪܬܵܐ؛ ܘܟܲܕ ܡܘܼܪܝܸܟܼܠܹܗ ܒܗܹܡܸܙܡܵܢ ܦܵܘܠܘܿܣ؛ ܝܘܼܩܪܸܢܵܐ ܡ̣ܢ ܫܸܢܬܵܐ ܢܦܸܠܹܗ ܠܐܸܠܬܸܚ ܡ̣ܢ ܬܠܵܬ݇ ܬܵܒܵܩܹ̈ܐ؛ ܘܦܸܫܠܹܗ ܫܩܝܼܠܵܐ ܡܝܼܬܵܐ. 10ܘܨܠܹܐܠܹܗ ܦܵܘܠܘܿܣ؛ ܢܦܸܠܹܗ ܥܲܠܘܼܗܝ ܘܚܦܸܩܠܹܗ؛ ܘܐَܡܸܪܹܗ؛ ܠܵܐ ܫܵܓܼܫܝܼܬܘܿܢ؛ ܣܵܒܵܒ ܕܓܵܢܹܗ ܒܝܼܹܗ ܝ݇ܠܵܗ̇. 11ܐܝܼܢܵܐ ܘܟܲܕ ܐ݇ܣܸܩܠܹܗ؛ ܩܨܹܐܠܹܗ ܠܲܚܡܵܐ ܘܛܥܸܡܠܹܗ؛ ܘܗ݇ܘܹܐܠܹܗ ܗܲܡܙܘܼܡܹܐ ܪܵܒܵܐ ܗܲܠ ܙܪܵܩܵܐ ܕܝܵܘܡܵܐ؛ ܘܗ̇ܝܓܵܗ ܦܠܸܛܠܹܗ ܕܐܵܙܸܠ ܒܒܸܪܙܵܐ. 12ܘܠܘܼܒܸܠܗܘܿܢ ܠܗ̇ܘ ܓ̰ܘܲܢܩܵܐ ܟܲܕ ܚܲܝܵܐ؛ ܚܕܹܐܠܗَܘܿܢ ܒܝܼܹܗ ܪܵܒܵܐ. 13ܐܝܼܢܵܐ ܐܲܚܢܲܢ ܪ݇ܚܸܫܠܲܢ ܩܵܕ݇ܡܵܝܬܵܐ ܠܓܵܡܝܼ؛ ܘܛܪܹܐܠܲܢ ܠܬܹܣܘܿܣ؛ ܣܵܒܵܒ ܕܡ̣ܢ ܬܵܡܵܐ ܒܸܬ ܩܵܒ̇ܠܲܚ ܗَܘܵܘ ܠܹܗ ܠܦܵܘܠܘܿܣ؛ ܣܵܒܵܒ ܗܲܕܟܼܵܐ ܦܩܝܼܕܲܢ ܝܼܗَܘܵܐ؛ ܟܲܕ ܗܕܝܼܪܵܐ ܗَܘܵܐ ܠܹܐܙܵܠܵܐ ܒܒܸܪܙܵܐ. 14ܐܝܼܢܵܐ ܟܲܕ ܬܦܸܩܠܹܗ ܒܝܼܲܢ ܒܬܹܣܘܿܣ؛ ܫܩܸܠܲܢ ܐܸܠܹܗ ܒܓܵܡܝܼ؛ ܘܐَܬܹܐܠܲܢ ܠܡܝܼܛܘܿܠܝܼܢܹܐ. 15ܘܡ̣ܢ ܬܵܡܵܐ ܒܝܵܘܡܵܐ ܐ݇ܚܹܪ݇ܢܵܐ ܛܪܹܐܠܲܢ ܠܒܲܪܩܘܼܒܼܠ ܕܟܝܼܘܿܣ ܓܵܙܲܪܬܵܐ؛ ܘܡܸܢَܕܪܸܫَ ܒܝܵܘܡܵܐ ܐ݇ܚܹܪ݇ܢܵܐ ܐ݇ܬܹܐܠܲܢ ܠܣܵܡܘܿܣ؛ ܘܦܸܫܠܲܢ ܓܵܘ ܛܪܘܿܓܲܠܝܼܘܿܢ؛ ܘܒܝܵܘܡܵܐ ܐ݇ܚܹܪ݇ܢܵܐ ܐ݇ܬܹܐܠܲܢ ܠܡܝܼܠܹܛܘܿܣ. 16ܣܵܒܵܒ ܦܵܘܠܘܿܣ ܩܸܛܥܝܵܐ ܗَܘܵܐ ܒܠܸܒܹܗ ܕܛܵܪܹܐ ܡ̣ܢ ܠܟܸܣ ܐܵܦܸܣܘܿܣ؛ ܠܵܐ ܗ݇ܘܹܐ ܕܥܲܪܩܸܠ ܬܵܡܵܐ؛ ܣܵܒܵܒ ܕܡܲܠܝܘܼܙܹܐ ܗَܘܵܐ؛ ܕܐܸܢ ܡܵܨܝܵܐ ܗ݇ܘܵܐ؛ ܠܸܗ݇ܘܵܝܵܐ ܝܵܘܡܵܐ ܕܦܲܢܛܹܩܘܿܣܛܹܐ ܓܵܘ ܐܘܿܪܸܫܠܸܡ. 17ܘܡ̣ܢ ܡܝܼܠܹܛܘܿܣ ܫܘܼܕܸܪܹܗ ܠܐܵܦܸܣܘܿܣ ܘܩܪܹܐܠܹܗ ܠܩܲܫܝܼܫܹ̈ܐ ܕܥܹܕܬܵܐ. 18ܘܟܲܕ ܐ݇ܬܹܐܠܗ݇ܘܿܢ ܠܟܸܣܠܹܗ؛ ܐَܡܸܪܹܗ ܐܸܠܵܝܗܝ؛ ܐܲܚܬܘܿܢ ܒܝܼܕܵܥܝܵܐ ܝ݇ܬܘܿܢ ܕܡ̣ܢ ܝܵܘܡܵܐ ܩܵܕ݇ܡܵܝܵܐ ܕܥܒܼܸܪܝܼ ܓܵܘ ܐܵܣܝܼܵܐ؛ ܕܵܐܟܼܝܼ ܗَܘܹܐܠܝܼ ܠܟܸܣܠܵܘܟܼܘܿܢ ܟܠܹܗ ܙܲܒܼܢܵܐ؛ 19ܟܲܕ ܒܸܦܠܵܚܵܐ ܠܡܵܪܝܵܐ ܒܟܠܵܗ̇ ܡܲܟܝܼܟܼܘܼܬܵܐ ܕܚܝܼܵܠ ܘܒܕܸܡܥܹ̈ܐ؛ ܘܒܓ̰ܘܼܪ̈ܵܒܹܐ ܕܩܵܘܸܡܝܼ ܗَܘܵܘ ܥܲܠܝܼ ܒܦܸܠܡܹ̈ܐ ܕܝܼܗ݇ܘܼܕܵܝܹ̈ܐ. 20ܘܠܵܐ ܚܣܸܟܼܠܝܼ ܡܸܢܕܝܼ ܕܘܵܓ̰ܸܒ ܝܼܗَܘܵܐ ܕܡܲܟܪܸܙܸܢ ܗَܘܵܐ ܠܵܘܟܼܘܿܢ؛ ܘܡܵܠܦܸܢ ܗَܘܵܐ ܠܵܘܟܼܘܿܢ ܒܫܘܼܩܹ̈ܐ ܘܒܵܬܹ̈ܐ؛ 21ܘܟܲܕ ܣܵܗܕܸܢ ܗَܘܵܐ ܠܝܗ݇ܘܼܕܵܝܹ̈ܐ ܘܠܲܐܪ̈ܡܵܝܹܐ ܒܘܼܬܿ ܬܝܵܒܼܘܼܬܵܐ ܠܟܸܣ ܐܲܠܵܗܵܐ؛ ܘܗܲܝܡܵܢܘܼܬܵܐ ܒܡܵܪܲܢ ܝܼܫܘܿܥ ܡܫܝܼܚܵܐ. 22ܘܐܵܕܝܼܵܐ؛ ܗܵܐ؛ ܐܵܢܵܐ ܐܲܣܝܼܪܵܐ ܒܪܘܼܚܵܐ؛ ܒܹܐܙܵܠܵܐ ܝ݇ܘܸܢ ܠܐܘܿܪܸܫܠܸܡ؛ ܘܠܹܐ ܝܘܸܢ ܒܝܼܕܵܥܝܵܐ ܡܘܼܕܝܼ ܒܸܬ ܬܵܦܸܩ ܒܝܼܝܼ ܓܵܘܵܗ̇؛ 23ܐܝܼܢܵܐ ܕܪܘܼܚܵܐ ܕܩܘܼܕܫܵܐ ܒܟܠ ܡܕܝܼܢ݇ܬܵܐ ܟܹܐ ܣܵܗܸܕ ܐܸܠܝܼ ܘܐܵܡܸܪ؛ ܕܝܸܣܘܼܪܹ̈ܐ ܘܐܘܼܠܨܵܢܹ̈ܐ ܗܕܝܼܪܹܐ ܝ݇ܢܵܐ ܐܸܠܘܼܟܼ. 24ܐܸܠܵܐ ܐܵܢܵܐ ܠܹܐ ܝ݇ܘܸܢ ܒܸܚܫܵܒܼܵܐ ܡܸܢܕܝܼ ܓܵܢܝܼ؛ ܐܲܝܟܼ ܕܬܲܡܸܡܸܢ ܪܲܗܛܝܼ ܘܚܸܠܡܲܬ ܕܩܘܼܒܸ̇ܠܝܼ ܡ̣ܢ ܡܵܪܲܢ ܝܼܫܘܿܥ؛ ܕܣܵܗܕܸܢ ܥܲܠ ܡܲܫܚܲܕܬܵܐ ܕܫܵܦܵܩܲܬܹܗ ܕܐܲܠܵܗܵܐ. 25ܘܐܵܕܝܼܵܐ؛ ܗܵܐ؛ ܐܵܢܵܐ ܒܝܼܕܵܥܝܵܐ ܝ݇ܘܸܢ؛ ܕܡܸܢَܕܪܸܫَ ܦܵܬܝܼ ܠܹܐ ܚܵܙܝܼܬܘܿܢ؛ ܟܠܵܘܟܼܘܿܢ ܐܵܢܝܼ ܕܚܕܸܪܝܼ ܡܘܼܟܪܸܙܠܝܼ ܓܵܘܵܘܟܼܘܿܢ ܡܲܠܟܘܼܬܵܐ. 26ܒܘܼܬܿ ܕܐܵܗܵܐ ܒܸܣܗܵܕܵܐ ܝ݇ܘܸܢ ܐܸܠܵܘܟܼܘܿܢ ܐܸܕܝܘܿܡ݇؛ ܕܕܸܟܼܝܵܐ ܝ݇ܘܸܢ ܡ̣ܢ ܕܸܡܵܐ ܕܟܠܵܘܟܼܘܿܢ. 27ܣܵܒܵܒ ܠܵܐ ܫܠܹܐܠܝܼ ܡ̣ܢ ܠܡܲܕܘܼܥܝܵܘܟܼܘܿܢ ܟܠܹܗ ܨܸܒܼܝܵܢܹܗ ܕܐܲܠܵܗܵܐ. 28ܗܲܕܟܼܵܐ ܗ݇ܘܹܝܡܘܿܢ ܗܸܫܝܵܪ ܒܓܵܢܵܘܟܼܘܿܢ ܘܒܟܠܵܗ̇ ܡܲܪܥܝܼܬܵܐ؛ ܗ̇ܝ ܕܩܲܡ ܡܲܩܸܡܠܵܘܟܼܘܿܢ ܓܵܘܵܗ̇ ܪܘܼܚܵܐ ܕܩܘܼܕܫܵܐ ܐܲܦܸܣܩܘܿܦܹ̈ܐ؛ ܕܡܲܪܥܝܼܬܘܿܢ ܠܥܹܕܬܹܗ ܕܲܡܫܝܼܚܵܐ؛ ܗ̇ܝ ܕܩܸܢܝܵܠܹܗ ܒܕܸܡܹܗ. 29ܣܵܒܵܒ ܐܵܢܵܐ ܒܝܼܕܵܥܝܵܐ ܝ݇ܘܸܢ؛ ܕܡܒܵܬ݇ܪ ܕܐܵܙܹܠ݇ܢ ܐ݇ܢܵܐ؛ ܒܸܬ ܥܵܒܼܪܝܼ ܓܵܘܵܘܟܼܘܿܢ ܕܹܐܒܹ̈ܐ ܙܲܪ̈ܒܵܢܹܐ ܕܠܹܐ ܥܵܒܼܕܝܼ ܪ̈ܲܚܡܹܐ ܥܲܠ ܡܲܪܥܝܼܬܵܐ. 30ܘܐܘܼܦ ܡ̣ܢ ܓܵܘ ܓܵܢܵܘܟܼܘܿܢ ܒܸܬ ܩܵܝܡܝܼ ܐ݇ܢܵܫܹ̈ܐ. ܗܲܡܙܘܼܡܹܐ ܡܸܢܕܝܼܵܢܹ̈ܐ ܦܟ̰ܝܼܠܹ̈ܐ؛ ܕܡܲܕܸܪܝܼ ܠܬܲܠܡܝܼܕܹ̈ܐ ܒܵܬ݇ܪܵܝܗܝ. 31ܒܘܼܬܿ ܕܐܵܗܵܐ ܗܵܘܹܝܬܘܿܢ ܪܥܝܼܫܹܐ؛ ܘܒܸܕܟܼܵܪܵܐ ܕܬܠܵܬ݇ ܫܸܢܹ̈ܐ ܠܵܐ ܫܠܹܐܠܝܼ ܒܠܲܝܠܹܐ ܘܒܐܝܼܡܵܡܵܐ؛ ܟܲܕ ܒܕܸܡܥܹ̈ܐ ܝܵܗ݇ܒܼܸܢ ܗَܘܵܐ ܢܵܨܝܼܗܲܬ ܠܟܠ ܐ݇ܢܵܫܵܐ ܡܸܢܵܘܟܼܘܿܢ. 32ܘܐܵܕܝܼܵܐ ܣܵܦܘܿܝܵܘܟܼܘܿܢ ܝܼܘܸܢ ܒܐܲܠܵܗܵܐ؛ ܘܒܗܹܡܸܙܡܵܢ ܕܫܵܦܵܩܲܬܹܗ؛ ܗ̇ܝ ܕܟܹܐ ܡܵܨܝܵܐ ܒܵܢܝܵܐ ܠܵܘܟܼܘܿܢ؛ ܘܝܵܗ݇ܒܼܵܐ ܠܵܘܟܼܘܿܢ ܝܵܪܬܘܼܬܵܐ ܓܵܘ ܟܠܵܝܗܝ ܩܲܕܝܼܫܹ̈ܐ. 33ܠܣܹܐܡܵܐ؛ ܝܲܢ ܠܕܲܗܒܼܵܐ؛ ܝܲܢ ܠܓ̰ܘܼܠܹ̈ܐ ܠܵܐ ܫܘܼܗ݇ܘܸܬܠܝܼ. 34ܐܲܚܬܘܿܢ ܒܝܼܕܵܥܝܵܐ ܝ݇ܬܘܿܢ ܕܠܣܢܝܼܩܘܼܬܝܼ؛ ܘܠܐܵܢܝܼ ܕܐܝܼܬ ܗَܘܵܘ ܥܲܡܝܼ؛ ܐܲܢܹܐ ܐܝܼܕܵܬ̈ܝܼ ܥܒܼܸܕܠܗ݇ܘܿܢ ܚܸܠܡܲܬ. 35ܘܒܟܠ ܡܸܢܕܝܼ ܩܲܡ ܡܲܚܙܸܢܵܘܟܼܘܿܢ؛ ܕܵܐܟܼܝܼ ܘܵܓ̰ܸܒ ܝܼܠܵܗ̇ ܠܸܓ̰ܗ݇ܝܵܐ ܘܠܗܲܝܘܼܪܹܐ ܠܙܲܒܘܼܢܹ̈ܐ؛ ܘܠܡܲܕܟܼܘܼܪܹܐ ܗܹܡܸܙܡܵܢܹ̈ܐ ܕܡܵܪܲܢ ܝܼܫܘܿܥ؛ ܕܗ̇ܘ ܐَܡܸܪܹܗ؛ ܛܘܼܒܼܵܐ ܠܗ̇ܘ ܕܝܵܗ݇ܒܼܸܠ ܙܵܘܕܵܐ ܡ̣ܢ ܠܗ̇ܘ ܕܫܵܩܸܠ. 36ܘܟܲܕ ܐܲܢܹܐ ܐَܡܸܪܹܗ؛ ܒܪܸܟ̇ܠܹܗ ܥܲܠ ܒܘܼܪ̈ܟܵܟܘܼܗܝ؛ ܘܨܘܼܠܹܐܠܹܗ ܥܲܡ ܟܠܵܝܗܝ ܐَܢܵܫܹ̈ܐ ܥܲܡܹܗ؛ 37ܘܗ݇ܘܹܐܠܹܗ ܒܸܟܼܝܵܐ ܓܘܼܪܵܐ ܓܵܘ ܟܠܵܝܗܝ؛ ܘܢܦܸܠܗ݇ܘܿܢ ܥܲܠ ܩܕܵܠܹܗ ܕܦܵܘܠܘܿܣ ܘܢܵܫܩܝܼ ܗَܘܵܘ ܠܹܗ؛ 38ܐܝܼܢܵܐ ܙܵܘܕܵܐ ܦܝܵܫܵܐ ܗَܘܵܘ ܒܚܲܫܵܐ ܥܲܠ ܕܗ̇ܝ ܗܹܡܸܙܡܵܢ ܕܐَܡܸܪܹܗ؛ ܕܡܸܢَܕܪܸܫَ ܠܹܐ ܚܵܙܝܼ ܗَܘܵܘ ܦܵܬܹܗ. ܘܡܘܼܦܫܸܛܠܗܘܿܢ ܐܸܠܹܗ ܗܲܠ ܓܵܡܝܼ.